காணும் இடமெலாம் அழகு
கண்டு ரசித்திடப் பழகு
உள்ளம் ஒன்றிட எண்ணம் நின்றிட
கண்ட பொருளெலாம் அழகு!
சுற்றும் பூமிக்குச் சுகமாக
சூரியன் போர்த்தும் ஒளியழகு
மேகம் பிரித்துத் திரியாக
வானம் பொழியும் மழையழகு
கலகல வென்றே சிரித்தபடி
கடந்து செல்லும் நதியழகு
கரைதொட்டுக் கால்கழுவும்
நுரை தாங்கிய அலையழகு
புல்பட்டுச் சேலை உடுத்தி
வளைந்தோடும் மலையழகு
ஒருகாலில் கிளைகள் தாங்கி
ஓங்கிநிற்கும் மரம் அழகு
மழை ஓய்ந்த பின்னாலே
வான் வரையும் வில்லழகு
வெயில் சாயும் முன்னாலே
முலாம் பூசும் வானழகு
•••
எட்டுவைத்துப் பூமியளக்கும்
இளம் பிஞ்சின் நடையழகு
எழுஸ்வரங்கள் தெரியாமல்
இழுக்கின்ற பாட்டழகு
சேய் முயன்ற முகப்பூச்சில்
குறை இருந்தால் ஓரழகு
பொட்டுவைத்துப் பூவைத்தால்
பூமியில் இனி யாரழகு?
பால்முகங்கள் பள்ளிசெல்ல
வாரிய தலையில் வகிடழகு
வகுப்பறையில் குருவிகளாய்
கீச்சுக் குரல் பேச்சழகு
பள்ளி முடிந்து வெளியேறி
துள்ளி வரும் படையழகு
வெள்ளி நிலா தோற்றிடுமே
பிள்ளை முக ஒளிஅழகு
காணும் இடமெலாம் அழகு
கண்டு ரசித்திடப் பழகு
உள்ளம் ஒன்றிட எண்ணம் நின்றிட
கண்ட பொருளெலாம் அழகு!
உதயகுமார் ஜே,ஆர்
8K எக்ஸ்பிரஸில் (8K Express) மே 2016-ல் வெளியானது
